سبەی کرایە پشوو

“بەهۆی بەفر بارینێكی زۆر لەسنورەكە بڕیاردرا سبەینێ‌ لەناوەندەكانی خوێندن كرایە پشووی فەرمی”.

زانا رەحمان قایمقامی قەزای پێنجوێن وتی “بەراوێژكردن لەگەڵ قایمقامیەتی قەزاكە، بەڕێوەبەرایەتی پەروەردەی پێنجوێن بڕیاریدا سبەینێ‌ (شەممە) بكاتە پشووی فەرمی لەناوەندەكانی خوێندن”.

وتیشی “لەنزیك ناوچەی ملەكەوەی پێنجوێن بەهۆی بەفربارینی زۆرەوە ئاستەنگی هاتوچۆ دروست بووە و بڕیارە تیمی پاككردنەوەی ڕێگاكە لەسلێمانییەوە بێن و ئەمشەو كاری تێدا بكەن”.

ئاماژەی بەوەش كردووە”بەهۆی ئەو كەشەوە لەئێستادا هاتوچۆی بارهەڵگر و ئۆتۆمبێلی بچووك وەستاوە تا رێگاكە پاك دەكرێتەوە”

کچێک لەزانکۆوە دەگەڕێندرێتەوە ئامادەیی

دوای زیاتر لە 5 ساڵ دەردەكەوێ كچە قوتابییەك لە پۆلی پێنجی ئامادەیی دەرنەچووە و چووەتە زانكۆش. دواتر لە زانكۆوە دەگەڕێندرێتەوە قۆناغی ئامادەیی. پەروەردەی سلێمانی لیژنەیەكی بۆ لێكۆڵینەوە لەگەڵ بەڕێوەبەر و یاریدەدەری قوتابخانەكە پێكهێناوە.

سۆزیار فاتیح محەممەد، خەڵكی دەربەندیخانە و ئەمساڵ لە كۆلێژی وەرزشی زانكۆی سەڵاحەدین وەرگیراوە، سۆزیار مانگێكیش دەوام دەكات، بەڵام دەیگەڕێننەوە بۆ ئامادەیی. سۆزیار بە (رووداو)ی گوت: “ساڵی 2012-2013 پۆلی 10ی ئامادەیی بووم، لە وانەی بیركاری پەڕینەوەم هەبوو، لە پۆلی 11 تاقیكردنەوەی وەرزی یەكەمم دا، بەڵام بۆ تاقیكردنەوەی دووەم ئاگادار نەكرام، پۆلی 11 و 12م تەواو كرد و لە كۆلێژی وەرزشی زانكۆی سەڵاحەدین وەرگیرام، هەموو شتكیش بەئاسایی دەڕۆیشت، بەڵام بڕوانامەكەیان هەڵوەشاندمەوە”.

سۆزیار دەشڵێ: “لە مانگی 11ی 2018 بە رێكەوتی ساڵی 2017 بەڕێوەبەری قوتابخانە، بەڵێننامەیەكی بە باوكم واژۆ كردووە كە گوایە كاتی خۆی منیان ئاگادار كردووەتەوە لەوەی هەردوو وەرزەكە تاقیكردنەوە بكەم و ژێربەژێریش كێشەكە چارەسەر دەكەن، ئینجا بە تەلەفۆن ئاگاداریان كردمەوە بڕوانامەكەم لە كۆلێژ وەربگرمەوە و بگەڕێمەوە دەربەندیخان، هەڕەشەی ئەوەشیان كرد ئەگەر وانەكەم پەیوەندی بە كۆلێژەكەوە دەكەن و كۆتایی بە خوێندنەكەم دێنن”.

سۆزیار پێیوایە بووەتە قوربانی هەڵەی بەڕێوەبەرانی قوتابخانەكەی :”من هەموو كاتێك ئامادەبووم بۆ تاقیكردنەوە و چاوەڕێ بووم، بەڵام دوو پۆلی دیكەشم بەبێ پەڕینەوە بڕی و ئاگاداریان نەكردمەوە، ئێستاش دوای 5 ساڵ كە لە زانكۆ وەرگیراوم و دەوامم كردووە، ئینجا دەمگەڕێننەوە بۆ پۆلی 10″.

بەڕێوەبەری قوتابخانەی خاك رۆژی 15/11/2018 بە نووسراوێك داوای لە بەڕێوەبەرایەتی پەروەردەی دەربەندیخان كردووە، بڕوانامەی سۆزیار هەڵبوەشێندرێتەوە، ئەوانیش لە 18/11/2018 داوا لە زانكۆی سەڵاحەدین دەكەن بڕوانامەی قوتابیەكە بگەڕێننەوە، بۆیە زانكۆی سەڵاحەدین سێ‌ رۆژ دواتر بڕیاری هەڵوەشانەوەی فەرمانی وەرگرتنی سۆزیار لە زانكۆكەیان دەردەكات.

ئەو قوتابییە نزیكەی سێ مانگە گەڕاوەتەوە ماڵەوە و دەڵێت: “بەهۆی هەڵەی بەڕێوەبەرایەتی قوتابخانەكەم خوێندنی ئەمساڵی زانكۆم لەدەستچوو، داوای پێكهێنانی لیژنەم كرد، ئەگەر لیژنەكە كێشەكەم بۆ چارەسەر نەكات، لە دادگای كارگێڕیی هەولێر سكاڵایان لەسەر تۆمار دەكەم”.

مامۆستا عەدنان عەلی عەبدوڵڵا، بەڕێوەبەری ئامادەیی خاك لە دەربەندیخان، سەبارەت بە كێشەی ئەو قوتابییە بە (رووداو)ی راگەیاند: “سۆزیار فێڵی لە ئێمە و كەسوكارەكەشی كردووە، بەڵام نەمانهێشت بەسەریاندا تێپەڕێ، ئەو زانیویەتی وانەی پەڕینەوەی هەیە و تاقیكردنەوەی نەكردووە، بەڵام قسەی نەكردووە”.

ئەی چۆن ئەوان بڕوانامەكەیان داوەتە قوتابییەكە؟ مامۆستا عەدنان گوتی: “یاریدەدەرەكەم لەبیری چووە كە پەڕینەوەی هەیە و بڕوانامەكەی داوەتەوە، دوای هەفتەیەك هات و گوتی بڕوانامەی قوتابییەكم داوەتەوە كە وانەی پەڕینەوەی هەبووە، بۆیە دەستبەجێ سەرووی خۆمان ئاگاداركردەوە”.

بەڕێوەبەری قوتابخانەكە دەشڵێ: “هەر ئەوكاتە كەسوكاری قوتابییەكەمان ئاگادار كردەوە كە بەهۆی كەمتەرخەمی خۆیەوە تاقیكردنەوەكەی نەكردووە، بەڵام ئەوان بڕوانامەكەیان نەهێنایەوە، بۆیە خۆم چوومە هەولێر و بڕوانامەكەم لە زانكۆ هێنایەوە، تەنانەت مافی ئەوەشم پێدا ساڵێكی دیكە لە زانكۆ و پەیمانگاكان وەربگیرێ”.

بۆچی پێشتر تاقیكردنەوەیان بە سۆزیار نەكردووە، مامۆستا عەدنان گوتی: “ئەم تۆمارە كە وانەی پەڕینەوەی هەبووە هی سەردەمی من نییە، بەڵكو هی دوو ساڵ و دوو بەڕێوەبەری پێش من بووە، بۆیە ئاگادار نەبووم، من دەمتوانی ویژدان و ئەخلاقی پیشەیی خۆم وەلابنێم و نمرەی بۆ دابنێم بەبێ ئەوەی كەس پێی بزانێ، بەڵام ئەمەم نەكرد، نمرە و تۆمار و بڕوانامە موڵكی گشتییە و دەرچوواندنی قوتابییەكی كەوتوو بە هەدەردانی موڵكی گشتییە، من لەسەر موڵكی گشتی هاتوومە دەنگ و سەرووی خۆم لێ ئاگادار كردەوە”.

بەڕێوەبەرایەتی گشتی پەروەردەی سلێمانی لیژنەیەكی لەسەر ئەم كەیسە پێكهێناوە، بەرپرسێكی پەروەردەی سلێمانی بە (رووداو)ی گوت: “لیژنەكە لەسەر بەڕێوەبەر و كارگێڕی قوتابخانە پێكهاتووە، چونكە ئەو داتابەیسەی تۆماری بڕوانامە كە هەیە هەمووی كۆدی خۆی هەیە و تەنیا لەلای بەڕێوەبەری قوتابخانەكە هەیە، بۆیە دەبێت هۆكاری ئەم هەڵەیە بزانرێت و ئیجرائات لەگەڵ ئەو كەسانە بكرێت كە هۆكاری دروستبوونی كێشەی خوێندكارەكەن”.

مامۆستا شاهۆ ئەحمەد، بەڕێوەبەری پەروەردەی دەربەندیخان لەبارەی لیژنەكە بە (رووداو)ی راگەیاند: “لیژنەكە لەسەر بەڕێوەبەری قوتابخانە و كارگێڕی قوتابخانەكە پێكهێنراوە و دەستی بە لێكۆڵینەوە كردووە، دواتر راپۆرتی خۆیان بۆ بەڕێوەبەری گشتی پەروەردەی سلێمانی بەرز دەكەنەوە و ئیجرائاتی یاسایی لەگەڵ ئەو كەسانە دەكرێ كە كەمتەرخەم بوون”.

لیژنەكە دەستبەكار بووە و هەمووان چاوەڕوانی بڕیاری كۆتایی لیژنەكەن، مامۆستا عەدنان عەلی گوتی: “لیژنەكە لەسەر ئێمە پێكهاتووە، هەموو بەڵگەكانمان داوە بە لیژنەكە، ئەوانیش داویانە بە داواكاری گشتی، رۆژی یەكشەممە 10/2/2019 داواكاری گشتی من و یاریدەدەرەكەمی بانگ كرد و هەموو روونكردنەوەیەكمان داوە پێیان، چاوەڕوانی بڕیاری كۆتایی ئەوانین”.

۱۰۰ کەسە دامەزراوەکەی رانیە چیان لێدێت ؟

روونکردنەوەیەک له راگەیاندنی نووسینگەی وەزیری دارایی وئابووری

دەربارەی بڵاوبوونەوەی نوسراوێکی سەرۆکایەتی ئەنجومەنی وەزیران ژمار (6800)لە 19/12/2018، تایبەتە بەلادان ودانانی (100) فەرمانبەری گرێبەست لە بەرێوەبەرایەتی شارەوانیەکانی راپەرین بە پێویستمان زانی ئەم روونکردنەوەیە رابگەیەنین:-
1- دامەزراندن ودانانی فەرمانبەری گرێبەست لە شوێنی فەرمانبەری گرێبەست کە واز دێنێت بەمەبەستی پرکردنەوەی شوێنیان، لە جیاتی دانانیان بۆدەکرێت بەپێ ی رێنماییەکان لەدەسەڵاتی سەرۆکایەتی ئەنجومەنی وەزیرانە بەپێی پێویست وداواکاری فەرمانگەکان.
2- رۆژانە چەندەها نوسراوی هاوشێوە ئەنجام دەدرێت بۆسەرجەم وەزارەتەکان وفەرمانگەکان بەپێی رەزامەندی سەرۆکایەتی ئەنجومەنی وەزیران جێ بەجێ دەکرێت لەلایان وەزارەتمان.
3- هیچ جۆرە لادانێکی نایاسایی لەو نوسراوەدا بەدی ناکەین.
4- لەبەر ئەوەی بەرێوەبەرایەتی شارەوانی راپەرین تازە کراوەتەوە (استحداپ ) کراوەوجیا کراوەتەوە لە بەرێوەبەرایەتی شارەوانیەکانی سلێمانی بۆیە گواستنەوەی میلاکیان بۆئەنجام دراوە.

                                راگەیاندنی نووسینگەی وەزیری دارایی وئابووری
                            10/2/2019

لەقه‌ڵادزێ دوو كه‌س به‌ پاره‌ی ساخته‌وه‌ ده‌ستگیر كران

پاش به‌ده‌ستهێنانی زانیاری هێزه‌كانمان له‌ بنكه‌ی پۆلیسی فریاكه‌وتنی پشده‌ر و بنكه‌ی نه‌هێشتنی تاوانی پشده‌ر (مكافحه‌) دوو گه‌نجیان به‌ پاره‌ی ساخته‌وه‌ ده‌ستگیر كرد كه‌ بڕێك پاره‌ی ساخته‌یان له‌ جۆری 10،000 ده‌ هه‌زار دیناری عێراقی پێ بووه‌ پاش لێكۆڵینه‌وه‌ش له‌ گه‌ڵیاندا دانیان ناوه‌ به‌ تاوانه‌كه‌یان كه‌ به‌ وته‌ی خۆیان 200،000 دوو سه‌د هه‌زار دینیاری تریشیان له‌ بازاڕه‌كانی سنوری ئیداره‌ی ڕاپه‌ڕین ساغ كردۆته‌وه‌.

یه‌كێك له‌و گه‌نجانه‌ ناوی (ی.م.ك) له‌دایك بووی ساڵی 1985 پیشه‌ی كاسب دانیشتووی ناحیه‌ی سه‌نگه‌سه‌ر سه‌ر به‌ قه‌زای پشده‌ر (قه‌ڵادزێ)یه‌ كوردی ئێرانه‌، وه‌ تۆمه‌تباری دووه‌م به‌ناوی ( ف . س . ف ) له‌دایك بووی ساڵی 2000 پیشه‌ی كاسب دانیشتووی ئێران شاری (ڕه‌زایه‌) كوردی ئێرانه‌.

تۆمه‌تباری دووه‌م كه‌ له‌ ئێرانه‌وه‌ هاتۆته‌ كوردستان و به‌ ڕێكه‌وتن له‌گه‌ڵ تۆمه‌تباری یه‌كه‌م كه‌ بۆ ماوه‌ی 5 مانگ ده‌بێ له‌ ناحیه‌ی سه‌نگه‌سه‌ر نیشته‌جێیه‌ ئه‌و پاره‌ ساخته‌یان له‌ بازاڕ ساغ كردۆته‌وه‌.

به‌ بڕیاری به‌ڕێز دادوه‌ر و به‌ مادده‌كانی 283 و 298 هه‌ردوو تۆمه‌تباره‌كه‌ ڕاگیر كراون، په‌ڕاوی لێكۆڵینه‌وه‌یان بۆ كراوه‌ته‌وه‌ و لێكۆڵینه‌وه‌ش به‌رده‌وامه‌.

ڕاگه‌یاندنی به‌ڕێوه‌به‌رایه‌تی پۆلیسی ڕاپه‌ڕین